អន្តរជាតិ ៖ ការវាយប្រហារបំផ្ទុះគ្រាប់បែកនៅប្រទេសស្រីលង្កា បានផ្ដាច់ជីវិតមនុស្ស១៨៥នាក់ ក្នុងនោះ៣៥នាក់ ជាជនបរទេស ខណៈមនុស្សជិត៥០០នាក់រងរបួស។ យោងតាមអាជ្ញាធរស្រីលង្កា ការវាយប្រហារបំផ្ទុះគ្រាប់បែកដ៏អាក្រក់ខាងលើ បានកើតឡើងនៅម៉ោង៨៖៤៥នាទីព្រឹកថ្ងៃអាទិត្យ ទី២១ ខែមេសា ឆ្នាំ២០១៩នេះ នៅចំពេលនៃពិធីបុណ្យគ្រឹស្ដសាសនា Easter Sunday ។ នេះបើតាមការចុះផ្សាយរបស់សារព័ត៌មានអន្តរជាតិ។
ទីភ្នាក់ងារព័ត៌មាន AFP របស់បារាំងដែលបានដកស្រង់សម្ដីមន្ត្រីនគរបាលស្រីលង្កា បានចុះផ្សាយថា មនុស្សយ៉ាងហោចណាស់ ៤៥នាក់ ត្រូវបានសម្លាប់នៅក្នុងការវាយប្រហាទៅលើសណ្ឋាគារ និងវិហារនៅរដ្ឋធានីកូឡុំបូ នៅថ្ងៃអាទិត្យនេះ។
បើតាមសេចក្ដីរាយការណ៍ដដែលនេះ មនុស្ស ៧៦នាក់ ត្រូវបានសម្លាប់នៅក្នុងការវាយប្រហារមួយទៅលើវិហារមួយស្ថិតនៅភាគខាងជើងរដ្ឋធានីកូឡុំបូ ហើយមនុស្ស ២៥នាក់ទៀត បានស្លាប់នៅក្នុងវិហារមួយកន្លែងស្ថិតនៅតំបន់ Batticoloa ស្ថិតនៅភាគខាងកើតប្រទេស។
AFP បានចុះផ្សាយបន្តថា យ៉ាងហោចណាស់មនុស្ស ១៦០នាក់ បានរងរបួសនៅក្នុងការវាយប្រហារមួយទៅលើវិហារ St. Anthony នៅព្រឹកថ្ងៃនេះផងដែរ។
ការវាយប្រហារបំផ្ទុះគ្រាប់បែកបានកើតឡើងនៅចំពេលដែលមនុស្សម្នាជាច្រើន នាំគ្នាចូលរួមពិធីបុណ្យគ្រឹស្ដសាសនា Easter Sunday នៅឯវិហារគ្រឹស្ដ St. Anthony ក្នុងទីក្រុង Colombo, វិហារគ្រឹស្ដ St. Sebastian នៃទីក្រុង Negombo និងវិហារគ្រឹស្ដ Zion Church ស្ថិតនៅទីក្រុង Batticaloa រួមទាំងសណ្ឋាគារចំនួន៣កន្លែងផ្សេងទៀត ដូចជា Shangri-La, Cinnamon Grand និង Kingsbury ក្នុងទីក្រុង Colombo។
ក្រោយការវាយប្រហារនេះភា្លមៗ មិនទាន់មានក្រុមណាមួយចេញមុខទទួលខុសត្រូវនៅឡើយទេ ហើយមានការព្រួយបារម្ភខ្លះខ្លាចក្រែងថា ក្រុមអ្នកប្រយុទ្ធ ISIS ដែលត្រឡប់មកពីតំបន់មជ្ឈិមបូព៌ាវិញ អាចទំនងជាអ្នកប្រព្រឹត្ត។ ខាងអាជ្ញាធរស្រីលង្កាផ្ទាល់ក៏មិនបានបញ្ជាក់លម្អិតពីការវាយប្រហារនេះ ឬមានមនុស្សប៉ុន្មាននាក់ ដែលដឹកនាំសកម្មភាពវាយប្រហារដ៏អាក្រក់នេះដែរ ខណៈការស៊ើបអង្កេតកំពុងធ្វើឡើង។
វិហារគ្រឹស្ដ Sebastian នៃទីក្រុង Negombo ត្រូវបានគេរាយការណ៍ថា រងការខូចខាតធ្ងន់ធ្ងរជាងគេ។ ប៉ុន្តែក្រោយការផ្ទុះទាំង៦លើក ការផ្ទុះលើកទី៧ និងលើកទី៨ក៏បានកើតឡើងផងដែរ នៅក្បែររដ្ឋធានីនៃប្រទេសមួយនេះ។
នាយករដ្ឋមន្ត្រីស្រីលង្កា លោក Ranil Wickremesinghe បានថ្កោលទោសយ៉ាងខ្លាំងចំពោះការវាយប្រហារបំផ្ទុះគ្រាប់បែកដ៏អាក្រក់នៅថ្ងៃអាទិត្យនេះ។
បណ្ដាមេដឹកនាំពិភពលោក មានដូចជានាយករដ្ឋមន្ត្រីអង់គ្លេស ប្រធានាធិបតីតួកគី អាមេរិក បារាំង អាល្លឺម៉ង់ បារ៉ែន អេមីរ៉ាត អារ៉ាប់រួម ជាដើម បានថ្កោលទោសយ៉ាងខ្លាំងចំពោះការវាយប្រហារដ៏អាក្រក់នេះ ហើយក៏បានចូលរួមរំលែកទុក្ខជាមួយក្រុមគ្រួសារសាច់ញាតិជនរងគ្រោះផងដែរ។
ស្រីលង្កាបានបិទបញ្ចប់សង្រ្គាមស៊ីវិលរយៈពេលជាង២៦ឆ្នាំជាមួយក្រុមឧទ្ទាមខ្លាតាមិល កាលពីខែឧសភា ឆ្នាំ២០០៩។ សង្រ្គាមស៊ីវិលនេះបានសម្លាប់មនុស្សពី ៧០,០០០ ដល់៨០,០០០នាក់។ ស្រីលង្កាមានអ្នកកាន់សាសនា ហិណ្ឌូ១២.៦ភាគរយ និងអ៊ីស្លាម៩.៧ភាគរយ ព្រមទាំងមានអ្នកកាន់សាសនាគ្រឹស្ដ១,៥លាននាក់៕
