រាជធានីភ្នំពេញ ៖ កាលពីវេលាម៉ោង១២និង១០យប់ រំលងអធ្រាត្រឈានចូលថ្ងៃព្រហស្បតិ៍ ទី៤ ខែកុម្ភៈ ឆ្នាំ២០២១សមត្ថកិច្ចបានឃាត់ ខ្លួនក្រុមក្មេងទំនើងមួយក្រុមដែលប្រមូលផ្ដុំគ្នានៅមុខការ៉ាស់សាំងមួយ តាមបណ្ដោយផ្លូវវេងស្រេង ក្នុងភូមិជ្រៃកោង២ សង្កាត់ចោមចៅទី២ ខណ្ឌពោធិ៍សែនជ័យ ខណៈពេលសមត្ថកិច្ចកំពុងតែល្បាត ហើយមានការសង្ស័យបានចូលទៅសួរនាំ និងឆែកឆេរឃើញដាវចំនួនប្រាំដើម និងប៉័ងតោពីរដើមទៀត ។
សមត្ថកិច្ចបានប្រាប់ឱ្យដឹងថា ក្មេងទំនើងមានចំនួន២៨នាក់ រួមទាំងម៉ូតូ១២គ្រឿង ដាវចំនួន៥ដើម និងកាំបិត ប័ងតោ២ដើមទៀត ត្រូវបានសមត្ថកិច្ចប្រមូល និងឃាត់ខ្លួនយកទៅសួរនាំនៅអធិការដ្ឋាន ខណ្ឌពោធិ៍សែនជ័យ រាជធានីភ្នំពេញ។
បច្ចុប្បន្ន ក្រុមក្មេងទំនើង និងវត្ថុតាង សមត្ថកិច្ចបាននាំទៅអធិការដ្ឋាននគរបាលខណ្ឌពោធិ៍សែនជ័យដើម្បី សួរនាំនិងបញ្ជូនបន្តទៅតាមនីតិវិធីនៃច្បាប់៕
