រាជធានីភ្នំពេញ ៖ សមត្ថកិច្ចជំនាញ បានស្ទាក់បង្ក្រាបរថយន្តមួយគ្រឿង ដែលដឹកសត្វគ្រួច ចំនួន៥០កេស ទម្ងន់១តោនកន្លះ ដែលគ្មានច្បាប់អនុញ្ញាត ត្រឹមត្រូវ ដឹកពីប្រទេសវៀតណាម នៅចំណុចផ្លូវជាតិលេខ៣ ក្នុងភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញ កាលពីវេលាម៉ោងជាង១រំលងអធ្រាត្រ ឈានចូលថ្ងៃទី២០ ខែវិច្ឆិកា ឆ្នាំ២០២០នេះ ។
រថយន្តល្មើសម៉ាក HYUNDAI ពណ៌ស ជាប្រភេទរថយន្តដឹកទំនិញចំណុះ៣,៥តោន ពាក់ស្លាកលេខកំពត 3A-0970 ដឹកសត្វគ្រួចមកពីប្រទេសវៀតណាម ចូលមកប្រទេសកម្ពុជា តាមច្រកព្រែកចាក ខេត្តកំពត ដើម្បីទៅចែកចាយនៅរាជធានីភ្នំពេញ ។ ប៉ុន្តែពុំមានលិខិតអនុញ្ញាតដឹកជញ្ជូនសត្វ ពីក្រសួងកសិកម្មនោះទេ ៕
