អន្តរជាតិ ៖ យ៉ាងហោចណាស់ជនអន្តោប្រវេសន៍ចំនួន៧៤នាក់បានលង់ទឹកស្លាប់ បន្ទាប់ពីទូករបសពួកគេបានលិចនៅជិតឆ្នេរនៃទីក្រុង Khums ក្នុងប្រទេសលីប៊ី។នេះបើយោងតាមការបញ្ជាក់ពីអង្គការអន្តោប្រវេសន៍អន្តរជាតិ (IOM) ដែលបានដកស្រង់ដោយព័ត៌មានស៊ីនហួរ។
IOM បាននិយាយនៅក្នុងសេចក្តីថ្លែងការណ៍មួយថា ទូកនោះបានផ្ទុកមនុស្សជាង១២០ នាក់ក្នុងនោះមានស្ត្រីនិងកុមារផងដែរ។ អ្នកនៅរស់រានមានជីវិតចំនួន៤៧នាក់ត្រូវបានឆ្មាំសមុទ្រនិងអ្នកនេសាទនាំយកមកគោកហើយសាកសព៣១នាក់ត្រូវបានស្រង់ចេញពីទឹកខណៈការស្វែងរកជនរងគ្រោះកំពុងបន្ត”។
IOM និយាយថា ចាប់តាំងពីថ្ងៃអង្គារមក មនុស្សយ៉ាងតិច១៩នាក់រួមទាំងកុមារ២នាក់ផងដែរបានលង់ទឹកស្លាប់បន្ទាប់ពីទូក២គ្រឿងបានលិចនៅកណ្តាលសមុទ្រមេឌីទែរ៉ាណេខណៈអង្គការក្រៅរដ្ឋាភិបាល Open Arms បានជួយសង្គ្រោះមនុស្សជាង២០០នាក់នៅក្នុងប្រតិបត្តិការចំនួន៣។
ទីភ្នាក់ងារជនអន្តោប្រវេសន៍ UN បាននិយាយថា ទូកដឹកមនុស្សប្រហែល២០០នាក់បានធ្វើដំណើរទៅកោះ Canary របស់ប្រទេសអេស្ប៉ាញហើយវាបានឆាបឆេះបន្ទាប់ពីចាកចេញពីទីក្រុងឆ្នេរសមុទ្រ Mbour ភាគខាងលិចប្រទេសសេណេហ្គាល់មុនពេលលិចនៅជិតកោះ Saint-Louis ឆ្នេរភាគពាយព្យប្រទេសនេះ។
យោងតាម IOM បានឲ្យដឹងថា ក្នុងឆ្នាំ២០២០នេះ មនុស្សយ៉ាងតិច៩០០នាក់បានលង់ទឹកស្លាប់ក្នុងសមុទ្រមេឌីទែរ៉ាណេខណៈព្យាយាមទៅដល់ច្រាំងអឺរ៉ុប៕
