ខេត្តកោះកុង ៖ នាថ្ងៃទី១៤ ខែមីនា ឆ្នាំ២០១៩ មន្ទីររ៉ែ និង ថាមពល ខេត្តកោះកុង បានចេញសេចក្តីជូនដំណឹង ថាអគ្គិសនីសំរាប់ផ្គត់ផ្គង់សម្រាប់ពលរដ្ឋនៅក្នុងក្រុងខេមរភូមិន្ទ និងស្រុកមណ្ឌលសីមា មិនបានគ្រប់គ្រាន់ឡើយ ដោយតំបន់ខ្លះមានអគ្គិសនីប្រើប្រាស់និងតំបន់ខ្លះពុំមានអគ្គិសនីប្រើប្រាស់ ដោយក្រុមអគ្គិសនីធ្វើការផ្គត់ផ្គង់ប្តូរវេន ។
នៅក្នុងសេចក្តីជូនដំណឹងនេះបានបញ្ជាក់ថា ដោយសារតែអាកាសធាតុនាពេលបច្ចុប្បន្ននេះ មានភាពរាំងស្ងួត បានធ្វើអោយស្ថានីយ៍ វារីអគ្គិសនីស្ទឹងតាតៃ និង វារីអគ្គិសនីស្ទឹងឫស្សីជ្រុំ មានកម្ពស់ទឹកទាប ពុំអាចទាញយកថាមពលអគ្គិសនីសម្រាប់ផ្គត់ផ្គង់ ក្នុងការប្រើប្រាស់បានគ្រប់គ្រាន់នៅក្នុងខេត្តក៏ដូចជាទូទាំងប្រទេសផងដែរ ។
ជាមួយគ្នានេះដែរមន្ទីររ៉ែនិងថាមពលខេត្តកោះកុងក៏បានសំណូមដល់បងប្អូនប្រជាពលរដ្ឋ ពិសេសម្ចាស់សណ្ឋាគារ ផ្ទះសំណាក់ សហគ្រាសនានា សូមត្រៀមម៉ាស៊ីនភ្លើងផ្ទាល់ខ្លួន សម្រាប់ប្រើប្រាស់ដោយខ្លួនឯង ចាប់ពីថ្ងៃជូនដំណឹងនេះតទៅ ហើយនៅពេលដែលក្រុមហ៊ុនអគ្គិសនីខេត្តកោះកុងបានទិញថាមពលអគ្គិសនី និងតបណ្តាញបន្ថែមពីព្រះរាជាណាចក្រថៃរួចរាល់ ការផ្គត់ផ្គង់ថាមពលអគ្គិសនី និងអាចប្រើប្រាស់បានជាធម្មតាឡើងវិញ ។
គួរំលឹកថា បន្ទាប់ពីមានការបំរែបំរួលនៃអាកាសធាតុនាឆ្នាំ២០១៩នេះបានធ្វើពលរដ្ឋ នៅក្នុងក្រុងខេមរភូមិន្ទ និងស្រុកមណ្ឌលសីមា នៃខេត្តកោះកុង បានប្រឈមនិងបញ្ហាខ្វះខាតទឹកសាបប្រើប្រាស់អស់រយះពេលជាង៣ខែមកហើយ ។
