ខេត្តបន្ទាយមានជ័យ ៖ បុរសម្នាក់បានធ្លាក់ពីលើផ្ទះដែលមានកម្ពស់៤ម៉ែត្រ ក្បាលត្រូវនឹងបង្គោលរបង ត្រូវរងរបួសធ្ងន់ ក្រោយបញ្ជូនដល់មន្ទីរពេទ្យបង្អែកស្រុកភ្នំស្រុកស្លាប់ នៅវេលាម៉ោង៩និង២០នាទីយប់ថ្ងៃទី១០ ខែកញ្ញា ឆ្នាំ២០២០ នៅភូមិណាំតៅ ឃុំណាំតៅ ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ឯក យ៉ត សុផល អធិការនគរបាលស្រុកភ្នំស្រុក ខេត្តបន្ទាយមានជ័យ បានឲ្យដឹងថាជនរងគ្រោះឈ្មោះ ជ្រឹង យុង ភេទប្រុសអាយុ៤១ឆ្នាំ នៅភូមិនៅភូមិណាំតៅ ឃុំណាំតៅ ស្រុកភ្នំស្រុក ខេត្ត បន្ទាយមានជ័យ។លោកអធិការបានបញ្ជាក់ថាតាមការអះអាងរបស់ឈ្មោះចាន់ សាឃួន ភេទស្រី អាយុ៤៧ឆ្នាំ ត្រូវជាប្រពន្ធជនរងគ្រោះបានឲ្យដឹងថា នៅមុនពេលកើតហេតុប្ដីរបស់គាត់ក្រោយពេលហូបបាយល្ងាចរួចក៏នាំគ្នាឡើងទៅលើផ្ទះបើកទូរទស្សន៍ លុះដល់ម៉ោងប្រហែល១០យប់ ប្ដីរបស់ខ្លួនបានក្រោកដើរទៅបត់ជើងតូច និងរ៉ង់ដាផ្ទះចំហៀងខាងជើង ពេលនោះគាត់បាន លឺសូរ សម្លេងធ្លាក់ពីលឺផ្ទះ ហើយក៏ស្ទុះទៅមើលឃើញប្តីរបស់គាត់ធ្លាក់ពីលើផ្ទះហើយស្រែកហៅឲ្យបងប្អូនជិតខាងជួយយកប្ដីមកមន្ទីរពេទ្យបង្អែកស្រុកភ្នំស្រុក ពេលមកដល់មន្ទីរពេទ្យបានមួយសន្ទុះ ប្ដីរបស់គាត់បានដាច់ខ្យល់ស្លាប់។
លោកអធិការបានបន្តឲ្យដឹងទៀតថាពេលទទួលបានពត៍មានកម្លាំងជំនាញពិនិត្យវិភាគសហការជាមួយកម្លាំងប៉ុស្តិ៍ណាំតៅ ប្រធានមណ្ឌលសុខភាពណាំតៅចុះពិនិត្យសពកន្លែងកើតហេតុ បើតាម សន្និដ្ឋានសពពិតជាស្លាប់ធ្លាក់ពីលើផ្ទះត្រូវនឹងបង្គោលរបងព្រំដីបែកក្បាលផ្នែកចិញ្ចើមខាងស្តាំមានឈាមហូរច្រើន រងរបួសធ្ងន់ក្រោយមកក៏ស្លាប់នៅមន្ទីរពេទ្យពិតប្រាកដ។សពជនរងគ្រោះត្រូវបានប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី៕
