ខេត្តបន្ទាយមានជ័យ ៖ អាជ្ញាធរថៃផ្អាកពលរដ្ឋខ្មែរចេញចូលដឹកជញ្ជូនទំនិញក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ ចាប់ពីថ្ងៃទី៤ដល់ថ្ងៃទី៧ ខែកញ្ញា ឆ្នាំ២០២០ ក្នុងឳកាសឈប់សម្រាកសាធារណៈរបស់ព្រះរាជាណាចក្រថៃ ។
រដ្ឋបាលក្រុងប៉ោយប៉ែតក្នុងលិខិតសេចក្តីជូនដំណឺងចុះថ្ងៃទី២៧ខែសីហាឆ្នាំ២០២០ ថា ៖ យោងលិខិតលេខ០០៣៨២/៤២៨៣ ចុះថ្ងៃទី១៨ខែសីហាឆ្នាំ២០២០ ស្តីពីការផ្អាកការអនុញ្ញាតិអោយពលរដ្ឋខ្មែរចេញចូលដឹកទំនិញក្នុងផ្សាររោងក្លឿ ។
សូមរំលឹកថា ៖ រដ្ឋបាលខេត្តបន្ទាយមានជ័យប្រទេសកម្ពុជា និងរដ្ឋបាលខេត្តស្រះកែវ ប្រទេសថៃ បានឯកភាពគ្នា ដើម្បីអនុញ្ញាតឱ្យ បងប្អូនអាជីវករខ្មែរពិនិត្យ និងប្រមូលទំនិញរបស់ពួកគេ នៅផ្សាររោងក្លឿ ចាប់ពីថ្ងៃទី ១៥ ខែកក្កដា ឆ្នាំ ២០២០ មក។
ប៉ុស្តិ៍ត្រួតពិនិត្យនឹងត្រូវបើករយៈពេល ៥ ម៉ោង ជារៀងរាល់ថ្ងៃ ចាប់ពីម៉ោង ៨ ព្រឹក ហើយមានតែរថយន្តចំនួន ៥០គ្រឿង ដែលត្រូវបាន អនុញ្ញាតឆ្លងកាត់ក្នុងមួយថ្ងៃ ។ ការបើកច្រកព្រំដែនជាជាថ្មីគឺ ដើម្បីជួយសម្រួលដល់អាជីវករកម្ពុជា ក្នុងការនាំទំនិញរបស់ពួកគេត្រឡប់ពីផ្សារថៃមកប៉ោយប៉ែតវិញ ។ ពួកគេមិនត្រូវបានអនុញ្ញាតអោយធ្វើសកម្មភាពអាជីវកម្មណាមួយនៅទីផ្សារនោះទេ ៕
