ខេត្តកំពង់ធំ ៖ មន្រ្តីជំនាញសាខាកាំកុងត្រូលសាខាខេត្តកំពង់ធំ ចុះពិនិត្យរកសារធាតុហាមឃាត់ដែលធ្វើ ឲ្យប៉ះពាល់សុខភាពអ្នកប្រើប្រាស់ក្នុងសសៃគុយទាវ និណែម ព្រមទាំងធ្វើការដកហូតទំនិញខូចគុណភាពមួយចំនួន នៅផ្សារស្ទោង ខេត្តកំពង់ធំ។
នៅថ្ងៃទី១៧ ខែមិថុនា ឆ្នាំ២០២០ សាខាកាំកុងត្រូលខេត្តកំពង់ធំ សហការណ៍ជាមួយមន្ទីរពាណិជ្ជកម្មខេត្ត ចុះពិនិត្យ និងស្វែងរកទំនិញខូចគុណភាពនៅផ្សារស្ទោង។ ក្នុងប្រតិបត្តិការណ៍នេះដែរ លោក លៀង សុភា ប្រធានសាខាកាំកុងត្រូលខេត្តកំពង់ធំ លើកឡើងថា សាខាកាំកុងត្រូល តែងតែធ្វើការសហការជាមួយមន្ទីរពាណិជ្ជកម្ម និងនគរបាលប៉ុស្តិ៍ ចុះអប់រំ ណែនាំអាជីវករជាញឹក ញាប់នៅគ្រប់ផ្សារទាំងអស់ក្នុងខេត្ត អំពីការតាំងលក់ទៅតាមប្រភេទទំនិញ, ប្រភេទទំនិញហាមឃាត់ និងប្រភេទសារធាតុហាមឃាត់មួយចំនួនដែលធ្វើឲ្យប៉ះពាល់សុខភាពអ្នកប្រើប្រាស់ធ្ងន់ធ្ងរ ដូចជាសាធាតុបូរ៉ាក់ជាដើម។ ជាមួយគ្នានេះ លោកបានធ្វើការពិនិត្យរកសារធាតុហាមឃាត់(បូរ៉ាក់) លើសសៃគុយទាវ និងណែម ដែលជីវករទិញពីក្រុមអ្នកផលិតនៅក្នុងមូលដ្ឋាន និងនាំចូលពីខេត្តផ្សេងមកពិនិត្យ ជាលទ្ធផលទំនិញទាំងពីរប្រភេទដែលលក់ដូរនៅក្នុងផ្សារនេះពុំមានសារធាតុ ហាមឃាត់ដែលធ្វើឲ្យប៉ះពាល់សុខភាពអ្នកបរិភោគឡើយ ។
ក្នុងប្រតិបត្តិការនេះផងដែរ មន្រ្តីជំនាញបានរកឃើញទំនិញខូចគុណភាព ហួសកាលបរិច្ឆេទប្រើប្រាស់ចំនួនប្រាំប្រភេទ គឺទឹកក្រូចម៉ាក ថាន់ឌ័រ ចំណុះ៤៨០មីលីលីត ចំនួន៥៤ដប ភេសជ្ជៈ M150 ចំណុះ ២៥០មីលីលីត ចំនួន១២កំប៉ុង ភេសជ្ជៈម៉ាកគ្រីនធី ចំណុះ៤២០មីលីលីត ចំនួន១២ដប ភេសជ្ជៈម៉ាក ហ្សិនយ៉ា ចំណុះ៥០០មីលីលីត ចំនួន១២ដប និងមីកំប៉ុងម៉ាកហ្គោល ចំណុះ៦៩ក្រាម ចំនួន១៣កំប៉ុង។ ទំនិញទាំងអស់នេះត្រូវបានដឹកយករក្សាទុកក្នុងមន្ទីរពាណិជ្ជកម្មខេត្ត រង់ចាំថ្ងៃដុតកំទេចចោលនាពេលខាងមុខ៕
