ខេត្តពោធិ៍សាត់ ៖ ប្រភពរាយការណ៍ពីកម្លាំងសហការចុះត្រួតពិនិត្យ និងស្រាវជ្រាវពាក់ព័ន្ធករណីចោរកម្ម នាសៀលថ្ងៃអង្គារ ទី៨ ខែមិថុនា ឆ្នាំ២០២០ នេះ មានករណីគាស់ទំលុះទំលាយលួចសម្ភារមន្ត្រីធនធានទឹក និងឧតុនិយម ឈានដល់ធ្វើការឃាត់ខ្លួនជនសង្ស័យជាមុខសញ្ញាចំនួន២នាក់ ។
ប្រភពព័ត៌មានខាងលើបន្តថា មុខសញ្ញាជនសង្ស័យត្រូវបានកម្លាំងឃាត់ខ្លួនទី១ ឈ្មោះ ទេព សុខឡា ហៅប្រុស ភេទប្រុស អាយុ ២៤ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្ន រស់នៅភូមិព្រែកទី១ ឃុំសំរោង ស្រុកភ្នំក្រវាញ ខេត្តពោធិ៍សាត់ ទី២ ឈ្មោះ រុន រ៉ាត់ ភេទប្រុស អាយុ ២២ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្ន រស់នៅភូមិ.ឃុំជាមួយគ្នា ។ ការឃាត់ចាប់ខ្លួនជនសង្ស័យទាំង ២នាក់នេះ ខណៈពួកគេជាប់ពាក់ព័ន្ធករណីគាស់ទំលុះទំលាយបន្ទប់ស្នាក់នៅ មន្ត្រីធនធានទឹក និងឧតុនិយម ដើម្បីលួចយកសម្ភារ ។សម្ភារៈបាត់បង់រួមមាន តុបាយចំនួន ២ បេនម៉ូតូ និងបេនម៉ាស៊ីនភ្លើងចំនួន ២គ្រឿង កង្ហារធំចំនួន ៨គ្រឿង កង់ម៉ូតូចំនួន ២ ឈើប្រភេទប្រណិត(ធ្នង់.នាងនួន និងម្រេញ) សរុបចំនួន ៦០០គីឡូក្រាម ម៉ូទ័រខាត់.ស្វាន និងម៉ាស៊ីនឈូសឈើចំនួន ៤គ្រឿង ម៉ាស៊ីនត្រជាក់ និងម៉ូទ័រញាក់ចំនួន ២គ្រឿង កង្ហារបឺតក្លិនចំនួន ១០គ្រឿង រួមទាំងគ្រឿងម៉ាស៊ីនមួយចំនួនទៀត និងផ្ទាំងសឡាទំហំ ៤០មល គុណនឹងទំហំ ៦០មលផងដែរ ។
ប្រភពបញ្ជាក់បន្ថែមទៀតថា ជនសង្ស័យជាមុខសញ្ញាត្រូវឃាត់ខ្លបានជាប់ពាក់ព័ន្ធករណីគាស់ទំលុះទំលាយលួចយកសម្ភាររបស់ឈ្មោះ ឆាត ខុម ភេទប្រុស អាយុ ៥០ឆ្នាំ ជនជាតិខ្មែរ មុខរបរ មន្ត្រីធនធានទឹក និងឧតុនិយម ខេត្តពោធិ៍សាត់ បានស្នាក់នៅប្រចាំការទំនប់ទី៣ ស្ថិតនៅភូមិវាល ឃុំសំរោង ស្រុកភ្នំក្រវាញ ខេត្តពោធិ៍សាត់។
បច្ចុប្បន្ន ជនសង្ស័យជាមុខសញ្ញាទាំង ២នាក់ រួមទាំងសម្ភារៈជាវត្ថុតាង រក្សាទុកជាបណ្ដោះអាសន្ន នៅអធិការដ្ឋាននគរបាលស្រុកភ្នំក្រវាញ ដើម្បីបំពេញសំណុំឯកសារតាមនិតិវិធីច្បាប់ ៕
