អន្តរជាតិ ៖ បើយោងតាមប្រភពពី BBC សាកសពមនុស្សចំនួន ៣៩នាក់ ដែលត្រូវគេរកឃើញនៅក្នុងទូកុងតឺន័រនៅអង់គ្លេស កាលពីខែមុន ត្រូវបានអាជ្ញាធរអង់គ្លេសបញ្ជាក់អត្តសញ្ញាណជាផ្លូវការថា ពួកគេជាជនជាតិវៀតណាមទាំងអស់ ។
ប៉ូលីសក្នុងតំបន់ Essex ដែលជាកន្លែងកើតហេតុ បានធ្វើកិច្ចការជាមួយនឹងមន្ត្រីវៀតណាម ដើម្បីកំណត់អត្តសញ្ញាសាកសពបុរស ៣១នាក់ និងស្ត្រី ៨នាក់។ សាកសពពួកគេត្រូវបានអាជ្ញាធរអង់គ្លេស រកឃើញកាលពីថ្ងៃទី ២៣ ខែតុលា កន្លងទៅនេះ។
អាជ្ញាធរអង់គ្លេសបានឲ្យដឹងថា ពួកគេចង់ផ្តល់ពេលវេលាឲ្យគ្រួសារជនរងគ្រោះទាំងអស់ទទួលយកព័ត៌មាន មុនពេលពួកគេបង្ហាញឈ្មោះនៃជនរងគ្រោះទាំងអស់ជាសាធារណៈ។ ប៉ូលិសបានបញ្ជាក់ថា ជនរងគ្រោះគឺមកពីខេត្ត Haiphong, Hai Duong, Nghe An, Ha Tinh, Quang Binh និង Hue នៃប្រទេសវៀតណាម។
សូមបញ្ជាក់ថា ក្រោយពេលប្រទះឃើញសាកសពមនុស្សជាច្រើន ប៉ូលីសអង់គ្លេសបានចាប់ខ្លួនអ្នកបើក និងមនុស្សពាក់ព័ន្ធផ្សេងទៀតពីបទឧក្រិដ្ឋកម្មនេះផងដែរ៕
