ខេត្តកំពត ៖ តាមព័ត៌មានបឋមបានឲ្យដឹងថា កាលពីល្ងាចថ្ងៃទី24 ខែមិថុនា ឆ្នាំ 2021 កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋានខេត្តកំពត ដឹកនាំដោយលោកប្រធានការិយាល័យព្រហ្មទណ្ឌកម្រិតស្រាល បានឃាត់ខ្លួនជនសង្ស័យឈ្មោះ ម៉ន សុខមាន មេការម៉ៅសំណង នៅចំណុចវត្តជុំវាល ឃុំជុំវាល ស្រុកទឹកឈូ ខេត្តកំពត តាមដីកាបង្គាប់ឲ្យនាំខ្លួនរបស់លោក អាំង សុភា ចៅក្រមស៊ើបសួរ តុលាការខេត្តកំពត។
សូមបញ្ជាក់ថា តាមពាក្យបណ្ដឹងរបស់អ្នកស្រី ប៉ុល លក្ខណា បានចោទប្រកាន់ចំពោះឈ្មោះ ម៉ន សុខមាន ដែល បានអះអាងជាក្រុមជាងសំណង់និងប្រើឧបាយកលទុច្ចរិតបោកបញ្ឆោតយកប្រាក់ពីម្ចាស់ផ្ទះនៃការសាងសង់ចំនួន 6 លើក សរុបទឹកប្រាក់ចំនួន 97 959 ដុល្លារអាមេរិក ហើយឈ្មោះ ម៉ន សុខមាន ក៏បានគេចវេសបញ្ឈប់ការសាងសង់តែម្ដង ទោះបីម្ចាស់ផ្ទះឲ្យចូលមកសម្របសម្រួលគ្នាយ៉ាងណា ក៏ឈ្មោះ ម៉ន សុខមាន ពុំព្រមចូលខ្លួនមកសម្របសម្រួលជាមួយម្ចាស់ផ្ទះនោះទេ ។ ករណីទង្វើឆបោកនេះប្រព្រឹត្តទៅនៅការដ្ឋានសំណង់របស់អ្នកស្រី ប៉ុល លក្ខណា នៅភូមិថ្មី សង្កាត់ព្រៃធំ ក្រុងកែបខេត្តកែប កាលពីថ្ងៃទី 19 ខែធ្នូ ឆ្នាំ 2018។
តាមប្រភពពីប្រជាពលរដ្ឋបានឲ្យដឹងថា ឈ្មោះ ម៉ន សុខមាន តែងតែអះអាងថាខ្លួនជាមេការម៉ៅការសំណង់ ហើយទទួលការសាងសង់ផ្ទះប្រជាពលរដ្ឋ ក្រោយពីបានទទួលប្រាក់ថ្លៃសាងសង់រួចហើយ ឈ្មោះនេះបានសាងសង់ប្រហែលតែ 30 ទៅ 40 ភាគរយ រួចគេចវេសមិនព្រមសាងសង់បញ្ចប់តាមកិច្ចសន្យា ដោយអាងមានខ្នងអ្នកធំនៅពីក្រោយ។
អ្នកស្រី ប៉ុល លក្ខណា សូមថ្លែងអំណរគុណចំពោះឯកឧត្តម ឯកឆេងហួត ព្រះរាជអាជ្ញានៃអយ្យការអមតុលាការខេត្តកំពត និងលោកចៅក្រមតុលាការខេត្តកំពត ព្រមទាំងនគរបាលស្នងការដ្ឋានខេត្តកំពតដែលបានខិតខំប្រឹងប្រែងឃាត់ខ្លួនជនសង្ស័យ និងនាំខ្លួនមកតុលាការខេត្តជំនុំជម្រះ ដើម្បីផ្ដល់យុត្តិធម៌ជូនភាគីរងគ្រោះ៕